പാലക്കാട്: വോട്ടെണ്ണൽ പുരോഗമിക്കുമ്പോൾ തൃത്താലയിൽ യു.ഡി.എഫ് സ്ഥാനാർത്ഥി വി.ടി. ബൽറാം ലീഡ് ചെയ്യുന്നു. ഫലം അനുകൂലമാകുമെന്ന സൂചനകൾ പുറത്തുവന്നതോടെ 'കം ബാക്ക്, താങ്ക്യു തൃത്താല' എന്ന അടിക്കുറിപ്പോടെ ബൽറാം പങ്കുവെച്ച ഫേസ്ബുക്ക് പോസ്റ്റ് ഇതിനോടകം സമൂഹമാധ്യമങ്ങളിൽ വൈറലായിക്കഴിഞ്ഞു.
ഇടത് സ്ഥാനാർത്ഥി എം.ബി. രാജേഷിന് മുന്നിൽ നിന്നുള്ള ഒരു സെൽഫിയാണ് പോസ്റ്റിനൊപ്പം ബൽറാം പങ്കുവെച്ചിരിക്കുന്നത്. സെൽഫിയിൽ എം.ബി. രാജേഷ് കണക്കുകൾ പരിശോധിക്കുന്നത് കാണാൻ സാധിക്കും. വോട്ടെണ്ണലിന്റെ നാലാം റൗണ്ട് പൂർത്തിയായപ്പോൾ തന്നെ ഇത്തവണ ബൽറാം തന്റെ ആത്മവിശ്വാസം പ്രകടിപ്പിക്കുകയായിരുന്നു. കഴിഞ്ഞ തവണ വോട്ടെണ്ണൽ പൂർത്തിയാകും മുൻപേ തോൽവി സമ്മതിച്ച് പോസ്റ്റിട്ട ബൽറാം, ഇക്കുറി വൻ തിരിച്ചുവരവാണ് പ്രതീക്ഷിക്കുന്നത്.
കഴിഞ്ഞ തവണ തൃത്താലയിൽ വിജയിച്ച എം.ബി. രാജേഷിനെതിരെ ശക്തമായ പോരാട്ടമാണ് വി.ടി. ബൽറാം ഇത്തവണ കാഴ്ചവെച്ചത്. എൽ.ഡി.എഫിനുള്ളിലെ ആഭ്യന്തര പ്രശ്നങ്ങളും വിഭാഗീയതയും തങ്ങൾക്ക് വോട്ടായി മാറുമെന്നായിരുന്നു യു.ഡി.എഫിന്റെ കണക്കുകൂട്ടൽ. ഒരു മന്ത്രിയും മുൻ എം.എൽ.എയും നേർക്കുനേർ വന്നതോടെ കേരളം ഉറ്റുനോക്കിയ മണ്ഡലമായി തൃത്താല മാറിയിരുന്നു.