ഇടുക്കി: നിയമസഭാ തിരഞ്ഞെടുപ്പ് ഫലം പുറത്തുവരാന് ദിവസങ്ങള് മാത്രം ബാക്കിനില്ക്കെ, സംസ്ഥാനത്ത് ഇടതുപക്ഷ ജനാധിപത്യ മുന്നണി വന് വിജയം നേടുമെന്ന് മുതിര്ന്ന സിപിഎം നേതാവും മുന് മന്ത്രിയുമായ എം.എം. മണി. കേരളത്തില് ഇക്കുറി നൂറിലധികം സീറ്റുകള് നേടി എല്ഡിഎഫ് ഭരണത്തുടര്ച്ച ഉറപ്പാക്കുമെന്ന് അദ്ദേഹം മാധ്യമങ്ങളോട് പറഞ്ഞു. ഇടുക്കി ജില്ലയിലെ രാഷ്ട്രീയ സാഹചര്യങ്ങള് വിശകലനം ചെയ്ത അദ്ദേഹം, ജില്ലയില് നിലവിലുള്ള നാല് സീറ്റുകളും എല്ഡിഎഫ് നിലനിര്ത്തുമെന്നും തൊടുപുഴയില് അപ്രതീക്ഷിത മുന്നേറ്റം ഉണ്ടായേക്കാമെന്നും കൂട്ടിച്ചേര്ത്തു.
തൊടുപുഴ മണ്ഡലത്തില് ഇത്തവണ അത്ഭുതങ്ങള് സംഭവിക്കാനാണ് സാധ്യതയെന്ന് എം.എം. മണി നിരീക്ഷിച്ചു. ദീര്ഘകാലം മണ്ഡലത്തെ പ്രതിനിധീകരിച്ച പി.ജെ. ജോസഫ് മത്സരരംഗത്ത് നിന്ന് മാറിനിന്നത് എല്ഡിഎഫിന് വലിയ ഗുണകരമാകും. യുഡിഎഫ് സ്ഥാനാര്ത്ഥിയായ അപു ജോണ് ജോസഫിനെതിരെയും അദ്ദേഹം രൂക്ഷമായ വിമര്ശനം ഉന്നയിച്ചു. 'അപ്പന് ഒന്നും ചെയ്യാത്ത മണ്ഡലത്തില് മകനെ സ്ഥാനാര്ത്ഥിയാക്കി' എന്ന വികാരം വോട്ടര്മാര്ക്കിടയിലുണ്ടെന്നും ഇത് യുഡിഎഫിന് കനത്ത തിരിച്ചടിയാകുമെന്നും മണി പരിഹസിച്ചു.
കോണ്ഗ്രസിന്റെ ഔദ്യോഗിക ചിഹ്നമായ കൈപ്പത്തിയെ ലക്ഷ്യം വെച്ചും മണി തന്റെ സ്വഭാവശൈലിയിലുള്ള വിമര്ശനങ്ങള് തൊടുത്തുവിട്ടു. 'കൈപ്പത്തി എന്ന് കേള്ക്കുമ്പോള് തന്നെ ഇപ്പോള് അറപ്പാണ്. കൈപ്പത്തി കൊണ്ട് ഉണ്ടാക്കി ഉണ്ടാക്കിയാണല്ലോ രാജ്യം ഇന്ന് ബിജെപിയുടെ കൈകളില് എത്തിയത്,' എന്ന് അദ്ദേഹം കുറ്റപ്പെടുത്തി. ഇടുക്കി മണ്ഡലത്തില് കൈപ്പത്തി ചിഹ്നത്തില് മത്സരിച്ചതുകൊണ്ട് മാത്രം യുഡിഎഫിന് വിജയിക്കാനാവില്ലെന്നും അദ്ദേഹം പറഞ്ഞു. തന്റെ മണ്ഡലമായ ഉടുമ്പന്ചോലയില് ഭൂരിപക്ഷം കഴിഞ്ഞ തവണത്തേക്കാള് അല്പം കുറഞ്ഞാലും വിജയം സുനിശ്ചിതമാണെന്നും അദ്ദേഹം ആത്മവിശ്വാസം പ്രകടിപ്പിച്ചു.
സംസ്ഥാനത്തെ ജനങ്ങള് വികസനത്തിനും ക്ഷേമപ്രവര്ത്തനങ്ങള്ക്കും ഒപ്പമാണെന്ന് എം.എം. മണി പറഞ്ഞു. യുഡിഎഫിന്റെ പ്രചാരണ തന്ത്രങ്ങള് ജനങ്ങള് തള്ളിക്കളഞ്ഞുവെന്നും മെയ് ആറിന് പെരുമാറ്റച്ചട്ടം അവസാനിക്കുന്നതോടെ എല്ഡിഎഫിന്റെ ഭരണത്തുടര്ച്ച യാഥാര്ത്ഥ്യമാകുമെന്നും അദ്ദേഹം വ്യക്തമാക്കി. ഇടുക്കി ജില്ലയില് എല്ഡിഎഫ് നേടിയെടുത്ത ജനപിന്തുണ വോട്ടെണ്ണല് കഴിയുമ്പോള് വ്യക്തമാകുമെന്നും മണി കൂട്ടിച്ചേര്ത്തു.