ചെന്നൈ: തമിഴ്നാട് നിയമസഭാ തിരഞ്ഞെടുപ്പിന്റെ വോട്ടെണ്ണൽ പുരോഗമിക്കവെ, വിജയിന്റെ നേതൃത്വത്തിലുള്ള തമിഴക വെട്രി കഴകം നടത്തുന്ന മുന്നേറ്റത്തെയും പ്രശംസിച്ച് ടൈഗർ ഷ്രോഫ്. സോഷ്യൽ മീഡിയയിലൂടെയാണ് ടൈഗർ ഷ്രോഫ് വിജയ്ക്ക് ആശംസകൾ നേർന്നത്. "അഭിനന്ദനങ്ങൾ വിജയ് സർ! ജനങ്ങൾക്ക് നിങ്ങളിലുള്ള വിശ്വാസം കാണുന്നത് അതിശയിപ്പിക്കുന്ന കാര്യമാണ്. ഈ അടുത്ത അധ്യായത്തിന് എല്ലാ കരുത്തും ആശംസിക്കുന്നു" എന്ന് ടൈഗർ കുറിച്ചു.
തിരുച്ചിറപ്പള്ളി ഈസ്റ്റ് മണ്ഡലത്തിൽ മത്സരിക്കുന്ന വിജയ്, വോട്ടെണ്ണലിന്റെ ആദ്യ റൗണ്ട് പൂർത്തിയാകുമ്പോൾ 6499 വോട്ടുകളുടെ വ്യക്തമായ ലീഡ് നേടിയിട്ടുണ്ട്. പ്രമുഖ ഡിഎംകെ സ്ഥാനാർത്ഥി ഇനിയഗോ ഇരുദയരാജിനെ പിന്തള്ളിയാണ് വിജയിന്റെ ഈ കുതിപ്പ്. തമിഴ്നാട് രാഷ്ട്രീയത്തിൽ ഡിഎംകെ, എഐഎഡിഎംകെ-ബിജെപി സഖ്യങ്ങൾ തമ്മിലുണ്ടായിരുന്ന പാരമ്പര്യ മത്സരത്തെ അപ്രസക്തമാക്കിക്കൊണ്ട് ടിവികെയുടെ ഒറ്റയ്ക്കുള്ള പോരാട്ടം പുതിയൊരു രാഷ്ട്രീയ ചരിത്രത്തിനാണ് തുടക്കമിടുന്നത്.
Congratulations to @actorvijay 🙌🏼
— Tiger Shroff (@iTIGERSHROFF) May 4, 2026
The faith people have in you is amazing to see. More power to you for this next chapter!💪🏻
തിരഞ്ഞെടുപ്പ് ഫലം അനുകൂലമായി വരുന്നതോടെ ചെന്നൈയിലെ പാർട്ടി ഓഫീസിന് മുന്നിലും തമിഴ്നാട്ടിലുടനീളവും വലിയ ആഘോഷങ്ങളാണ് നടക്കുന്നത്. വിജയിന്റെ സൂപ്പർ ഹിറ്റ് ഗാനമായ 'വിസിൽ പോടു' എന്ന പാട്ടിന് നൃത്തം ചെയ്തും മധുരം വിതരണം ചെയ്തും ആവേശത്തിലാണ് പാർട്ടി പ്രവർത്തകർ. ഫലം ഔദ്യോഗികമായി പ്രഖ്യാപിക്കാനിരിക്കെ, തമിഴ് മണ്ണിൽ വിജയിന്റെ രാഷ്ട്രീയ പ്രവേശനം വൻ മാറ്റങ്ങൾ കൊണ്ടുവരുമെന്നാണ് പ്രാഥമിക സൂചനകൾ നൽകുന്നത്.