ഓഫീസിലും തുടരുന്ന പി.ടി.എ. മീറ്റിങ്; മാനേജരോട് മകളുടെ പെരുമാറ്റത്തെക്കുറിച്ച് ചോദിച്ച് മാതാപിതാക്കൾ

കുട്ടിക്കാലത്ത് സ്കൂളുകളിലെ പി.ടി.എ. മീറ്റിങ്ങുകൾ നമ്മളിൽ പലർക്കും പേടിയുള്ള കാര്യമായിരുന്നു. എന്നാൽ ജോലി കിട്ടി കോർപ്പറേറ്റ് ലോകത്തേക്ക് കടന്നാലും ഈ പി.ടി.എ. മീറ്റിങ് തുടർന്നാലോ? ബെംഗളൂരുവിൽ ജോലി ചെയ്യുന്ന ഒരു യുവതിക്കാണ് ഈ രസകരമായ അനുഭവം ഉണ്ടായത്. To advertise here, തേജസ്വിനി ആനന്ദ് എന്ന യുവതിയാണ് ഇൻസ്റ്റാഗ്രാമിലൂടെ തന്റെ ഈ വ്യത്യസ്തമായ അനുഭവം ലോകവുമായി പങ്കുവെച്ചത്. മാതാപിതാക്കൾ അവളുടെ ഓഫീസ് സന്ദർശിച്ചപ്പോൾ എടുത്ത ഒരു വീഡിയോയാണ് സോഷ്യൽ മീഡിയയിൽ ചിരി പടർത്തുന്നത്. സാധാരണയായി മാതാപിതാക്കൾ മക്കളുടെ ഓഫീസ് സന്ദർശിക്കുന്നത് വളരെ സന്തോഷകരമായ ഒന്നാണ്. എന്നാൽ ഇവിടെ തേജസ്വിനിയുടെ മാതാപിതാക്കൾ നേരെ പോയത് അവളുടെ മാനേജറുടെ അടുത്തേക്കാണ്; അവർ ചോദിച്ചതാകട്ടെ ഓഫീസിലെ അവളുടെ പെരുമാറ്റത്തെക്കുറിച്ചും! വീഡിയോയിൽ തേജസ്വിനി നൽകിയ കുറിപ്പ് ഏറെ ശ്രദ്ധേയമായിരുന്നു: 'എല്ലാ മാതാപിതാക്കളും ഓഫീസ് സന്ദർശനം ആസ്വദിക്കുമ്പോൾ, എന്റെ മാതാപിതാക്കൾ മാനേജരോട് എന്റെ പെരുമാറ്റത്തെക്കുറിച്ച് ചോദിക്കുന്നു. സ്കൂളിലെ പി.ടി.എ. മീറ്റിങ്ങുകളിൽ തുടങ്ങി ഇതിപ്പോ ഇവിടെ വരെ എത്തി, ഇത് ഒരിക്കലും അവസാനിക്കില്ലെന്ന് തോന്നുന്നു'. 'ഇതാണ് തനി നാടൻ മാതാപിതാക്കൾ' എന്ന കുറിപ്പോടെയാണ് ഈ വീഡിയോ അവൾ പോസ്റ്റ് ചെയ്തത്. ഈ വീഡിയോ ചുരുങ്ങിയ സമയം കൊണ്ട് തന്നെ ഓൺലൈനിൽ വലിയ ശ്രദ്ധ നേടുകയും നിരവധി പേർ തങ്ങളുടെ പ്രതികരണങ്ങളുമായി രംഗത്തെത്തുകയും ചെയ്തു. ഈ സംഭവം നാണക്കേടുണ്ടാക്കുന്ന ഒന്നല്ലെന്നും വളരെ മനോഹരമായ ഒരു കാഴ്ചയാണെന്നും ചിലർ അഭിപ്രായപ്പെട്ടു. 'മക്കൾ എത്ര മുതിർന്നാലും മാതാപിതാക്കൾക്ക് അവർ എപ്പോഴും കുട്ടികൾ തന്നെയായിരിക്കും' എന്ന് നിരവധി പേർ ചൂണ്ടിക്കാട്ടി. ഇതൊരു ഓഫീസ് മീറ്റിങ് ആണോ അതോ പി.ടി.എ. മീറ്റിങ് ആണോ എന്ന് മാനേജർക്ക് പോലും സംശയം തോന്നിയിട്ടുണ്ടാകും എന്ന രസകരമായ കമന്റും വീഡിയോയ്ക്ക് താഴെ വന്നിട്ടുണ്ട്. ചുരുക്കത്തിൽ, ജോലിസ്ഥലത്തെ ഈ 'പി.ടി.എ. മീറ്റിങ്' സോഷ്യൽ മീഡിയയിൽ വൈറലായിരിക്കുകയാണ്. Content Highlights: A Bengaluru-based woman's Instagram video has gone viral after her parents visited her corporate office and began questioning her manager about her behavior, reminiscent of a school PTA meeting. Published: 07 Apr 2026, 09:43 pm IST Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.