വിശുദ്ധവാരാചരണത്തിന് നാളെ തുടക്കം

കാഞ്ഞിരപ്പള്ളി : ക്രൈസ്തവവിശ്വാസികൾ വലിയനോമ്പാചരണത്തിന്റെ അവസാന ആഴ്ചയായ വിശുദ്ധവാരത്തിലേക്ക് ഞായറാഴ്ച പ്രവേശിക്കും. ദേവാലയങ്ങളിൽ ഓശാന ഞായറാഴ്ച കുരുത്തോല പ്രദക്ഷിണം നടത്തും. To advertise here, യേശുക്രിസ്തുവിന്റെ ജറുസലേം പ്രവേശനത്തിന്റെ ഓർമ്മപുതുക്കലായുള്ള ഓശാന ഞായറാഴ്ചയോടെയാണ് വിശുദ്ധവാരം, അഥവാ പീഡാനുഭവവാരം തുടങ്ങുന്നത്. ജറുസലേം നഗരത്തിലേക്ക് കഴുതപ്പുറത്തേറിവന്ന യേശുക്രിസ്തുവിനെ 'ഓശാന... ഓശാന... ദാവീദിന്റെ പുത്രന് ഓശാന' എന്നുപാടി സാധാരണക്കാരായ ജനങ്ങൾ വരവേറ്റതിന്റെ ഓർമ്മപുതുക്കി പള്ളിയിലേക്ക് കുരുത്തോലയുമേന്തി വിശ്വാസികൾ പ്രദക്ഷിണം നടത്തും. കുരിശിലേറ്റപ്പെടുന്നതിന്റെ മുൻപ് ശിഷ്യന്മാർക്കൊപ്പമുള്ള അന്ത്യത്താഴത്തിന്റെയും ശിഷ്യന്മാരുടെ കാലുകഴുകിയതിന്റെയും ഓർമ്മയാണ് പെസഹാ വ്യാഴാഴ്ച നടത്തുന്നത്. പെസഹാ വ്യാഴാഴ്ച വിശുദ്ധകുർബാന സ്ഥാപിച്ച ദിനമായും ക്രൈസ്തവർ ആചരിക്കുന്നു. പള്ളികളിൽ നടക്കുന്ന തിരുകർമങ്ങളിൽ 12-ശിഷ്യന്മാരുടെ കാൽകഴുകിയതിന്റെ ഓർമ്മപുതുക്കി പുരോഹിതർ 12-വിശ്വാസികളുടെ കാലുകൾ കഴുകും. തുടർന്ന് വീടുകളിൽ വിശ്വാസികൾ പുളിപ്പില്ലാത്ത അപ്പംമുറിച്ച് പെസഹാ ആചരിക്കും. യേശുക്രിസ്തുവിനെ കുരിശിലേറ്റിയ ദിവസം ദുഃഖവെള്ളിയാഴ്ചയായി ആചരിക്കും. പീഡാനുഭവ തിരുകർമങ്ങൾ, കുരിശിന്റെ വഴി, പീഡാനുഭവവായന എന്നിവയിലൂടെ യേശുക്രിസ്തുവിന്റെ സഹനത്തെയും അതിലൂടെ സംജാതമായ രക്ഷയെയും വിശ്വാസികൾ അനുസ്മരിക്കുന്നു. ദുഃഖശനിയാഴ്ച ആരംഭിക്കുന്ന തിരുക്കർമങ്ങളെത്തുടർന്ന് ഞായറാഴ്ച പുലർച്ചെ ഉയിർപ്പു തിരുനാൾ (ഈസ്റ്റർ) കർമങ്ങൾ പള്ളികളിൽ നടത്തും. ഉയിർപ്പുതിരുനാൾ കർമങ്ങളോടെ വലിയനോമ്പിനും വിശുദ്ധവാരത്തിനും സമാപനമാകും. Published: 28 Mar 2026, 01:49 am IST Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.