'ദുർഗ' വരുന്നു; നെഞ്ചിടിപ്പേറ്റാൻ ഇന്ത്യയുടെ ഡയറക്ട് എനർജി ആയുധം

ആ ധുനിക യുദ്ധമുഖത്തെ ഡ്രോൺ കൂട്ടങ്ങളെയും (Drone Swarms) മറ്റ് വ്യോമ ഭീഷണികളെയും നേരിടാൻ ലക്ഷ്യമിട്ട് ഇന്ത്യ പുതിയ ലേസർ ആയുധങ്ങൾ വികസിപ്പിക്കുന്നു. ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷൻ (DRDO) വികസിപ്പിക്കുന്ന 'ദുർഗ-II' (DURGA-II), 'എകൈ-2 (എ)( Mk-II(A))' എന്നീ ഡയറക്റ്റഡ് എനർജി വെപ്പൺ (DEW) സംവിധാനങ്ങൾ ഇന്ത്യയുടെ വ്യോമ പ്രതിരോധത്തിൽ വലിയ മാറ്റങ്ങൾ കൊണ്ടുവരുമെന്ന് പ്രതീക്ഷിക്കുന്നു. ഡി.ആർ.ഡി.ഒ.യുടെ സെന്റർ ഫോർ ഹൈ എനർജി സിസ്റ്റംസ് ആൻഡ് സയൻസസ് ആണ് ഈ സംവിധാനങ്ങൾ വികസിപ്പിച്ചത്. നിലവിൽ യുഎസ്, റഷ്യ, ചൈന എന്നീ രാജ്യങ്ങൾക്ക് മാത്രമാണ് ഡയറക്ട് എനർജി ആയുധങ്ങളുടെ സാങ്കേതിക വിദ്യയുള്ളത്. ഈ പട്ടികയിലേക്കാണ് ഇന്ത്യയെത്തിയിരിക്കുന്നത്. To advertise here, നിലവിൽ ഡ്രോണുകളെ വെടിവെച്ചിടാൻ ഉപയോഗിക്കുന്ന മിസൈലുകൾക്ക് വലിയ ചിലവുണ്ട്. ഉദാഹരണത്തിന്, ഓരോ തവണ മിസൈൽ ഉപയോഗിക്കുമ്പോഴും ലക്ഷക്കണക്കിന് രൂപ ചെലവാകുന്നു. എന്നാൽ ലേസർ ആയുധങ്ങൾ വൈദ്യുതി ഉപയോഗിച്ചാണ് പ്രവർത്തിക്കുന്നത് എന്നതിനാൽ ഇതിന്റെ പ്രവർത്തന ചെലവ് വളരെ കുറവാണ്. ഏതാനും ലിറ്റർ ഇന്ധനത്തിന്റെ വിലയേ ഒരു തവണ ലേസർ പ്രയോഗിക്കാൻ വരികയുള്ളൂ എന്ന് ഗവേഷകർ കണക്കാക്കുന്നു. ഇതിനെ 'നിയർ സീറോ കോസ്റ്റ് പെർ ഷോട്ട്' (Near-zero cost per shot) എന്നാണ് വിശേഷിപ്പിക്കുന്നത്. ലേസർ രശ്മികൾ പ്രകാശവേഗതയിൽ സഞ്ചരിക്കുന്നതിനാൽ, മിസൈലുകളെ അപേക്ഷിച്ച് വളരെ വേഗത്തിൽ ലക്ഷ്യസ്ഥാനത്ത് എത്തും. ലക്ഷ്യം നിശ്ചയിച്ചു കഴിഞ്ഞാൽ നിമിഷങ്ങൾക്കുള്ളിൽ തന്നെ ശത്രു ഡ്രോണുകളെയോ മിസൈലുകളെയോ തകർക്കാൻ ഇതിന് സാധിക്കും. ലേസർ ആയുധങ്ങൾ വളരെ കൃത്യതയോടെ പ്രയോഗിക്കാൻ സാധിക്കും. ഇത് ഡ്രോൺ കൂട്ടങ്ങളിലെ ഓരോ ഡ്രോണിനെയും പ്രത്യേകം ലക്ഷ്യം വെച്ച് തകർക്കാൻ സഹായിക്കുന്നു. മിസൈൽ ബാറ്ററികളിൽ പരിമിതമായ എണ്ണം മിസൈലുകൾ മാത്രമേ ഉണ്ടാകൂ. എന്നാൽ ലേസർ സംവിധാനങ്ങൾക്ക് വൈദ്യുതി ലഭ്യമാകുന്നിടത്തോളം കാലം എത്ര തവണ വേണമെങ്കിലും ആക്രമണം നടത്താൻ സാധിക്കുമെന്നാണ് ഇവയുടെ പ്രധാന സവിശേഷത. ഈ ലേസർ രശ്മി ലക്ഷ്യസ്ഥാനത്തെ ഒരു നിശ്ചിത പോയിന്റിൽ കേന്ദ്രീകരിക്കുകയും, അതിവേഗം താപം വർദ്ധിപ്പിക്കുകയും ചെയ്യുന്നു. ഇതോടെ മിസൈലുകൾക്കും ഡ്രോണുകൾക്കും ഘടനാപരമായ തകരാറുകളുണ്ടാക്കും. അവയുടെ പുറംകവചങ്ങൾ നശിക്കുകയോ കേടുപാടുകൾ സംഭവിക്കുകയോ ചെയ്യും. അതിലൂടെ അവയുടെ പ്രവർത്തനം കാര്യക്ഷമമല്ലാതാകും. അല്ലെങ്കിൽ അതിലെ ഇലക്ട്രോണിക് സംവിധാനങ്ങൾ ലേസർ ആക്രമണത്താൽ നശിപ്പിക്കപ്പെടുകയും ചെയ്യും. ഇതോടെ ഉദ്ദേശിച്ച സ്ഥലത്ത് ആക്രമണം നടത്താൻ എത്തുന്നതിന് മുമ്പ് തന്നെ അവ പരാജയപ്പെടും. 100 കിലോവാട്ടിലധികം ശേഷിയുള്ള ഒരു ഹൈ-പവർ ലേസർ ആയുധമാണ് ദുർഗ-II'. ക്രൂയിസ് മിസൈലുകൾ, ഹെലികോപ്റ്ററുകൾ, വിമാനങ്ങളിലെ സെൻസറുകൾ എന്നിവയെ തകർക്കാൻ ഈ സംവിധാനത്തിന് ശേഷിയുണ്ട്. എംകെ-2(എ).30 കിലോവാട്ട് ശേഷിയുള്ള ഒരു ലേസർ സംവിധാനമാണ്. ചെറിയ ഡ്രോണുകളെയും ഡ്രോൺ കൂട്ടങ്ങളെയും തകർക്കാനാണ് ഇത് പ്രധാനമായും ഉപയോഗിക്കുന്നത്. 2025 ഏപ്രിലിൽ കുർണൂൽ ഡ്രോൺ ടെസ്റ്റ് റേഞ്ചിൽ നടന്ന പരീക്ഷണത്തിൽ ഒന്നിലധികം ഡ്രോണുകളെ ഈ ലേസർ സംവിധാനം വിജയകരമായി തകർത്തിരുന്നു. ശത്രുക്കളുടെ ആക്രമണങ്ങളെ കൃത്യതയോടെ നേരിടാനുള്ള ഇന്ത്യയുടെ ശേഷി ഈ പരീക്ഷണം തെളിയിച്ചു. ഭാവിയിൽ ഇന്ത്യയുടെ സുരക്ഷാ സംവിധാനങ്ങളിൽ മിസൈലുകൾക്കൊപ്പം ഈ ലേസർ ആയുധങ്ങളും ഒരു പ്രധാന പങ്കുവഹിക്കും. ഇന്ത്യയുടെ ദേശീയ വ്യോമ പ്രതിരോധ ശൃംഖലയായ 'മിഷൻ സുദർശൻ ചക്ര'യുടെ ഭാഗമായി ഈ ലേസർ ആയുധങ്ങളെയും ഉൾപ്പെടുത്താൻ പദ്ധതിയുണ്ട്. ഭാവിയിൽ യുദ്ധക്കപ്പലുകളിലും വിമാനങ്ങളിലും ഇത്തരം ലേസർ ആയുധങ്ങൾ ഘടിപ്പിക്കാനാണ് ഡി.ആർ.ഡി.ഒ. ലക്ഷ്യമിടുന്നത്. ഇത് ഇന്ത്യയുടെ പ്രതിരോധ ശേഷിയെ ഒരു 'സ്റ്റാർ വാർസ്' നിലവാരത്തിലേക്ക് ഉയർത്തുമെന്ന് വിദഗ്ധർ അഭിപ്രായപ്പെടുന്നു. ഇതിനൊപ്പം മറ്റ് ചില അത്യാധുനിക ആയുധങ്ങളും ഇന്ത്യ വികസിപ്പിക്കുന്നുണ്ട്. അവതാഴെ പറയുന്നു. പ്രോജക്റ്റ് ആദിത്യ: ഇത് 100 കിലോവാട്ട് ശേഷിയുള്ള ഒരു 'ഗ്യാസ് ഡൈനാമിക് ലേസർ' (Gas Dynamic Laser) ആണ്. ഭാവിയിലെ ലേസർ ആയുധങ്ങൾക്കായുള്ള നിർണ്ണായക സാങ്കേതികവിദ്യകൾ പരീക്ഷിക്കുന്നതിനുള്ള ഒരു പരീക്ഷണാടിസ്ഥാനത്തിലുള്ള പ്ലാറ്റ്ഫോമായാണ് ഇതിനെ കണക്കാക്കുന്നത്. കാളി ( KALI-Kilo Ampere Linear Injector): ഇന്ത്യ വികസിപ്പിച്ച ലേസർ ഇതര ആയുധ പദ്ധതികളിൽ ഒന്നാണിത്. ഇത് ഇലക്ട്രോണിക് സംവിധാനങ്ങളെ പ്രവർത്തനരഹിതമാക്കാൻ ലക്ഷ്യമിടുന്നു. ഹൈ-പവർ മൈക്രോവേവ് (HPM) സിസ്റ്റം: ഡ്രോണുകളുടെ ഇലക്ട്രോണിക് സംവിധാനങ്ങളെ 5 കിലോമീറ്റർ ദൂര പരിധിയിൽ വെച്ച് നശിപ്പിക്കാൻ ശേഷിയുള്ള റേഡിയോ ഫ്രീക്വൻസി അധിഷ്ഠിത സംവിധാനമാണിത്. ലേസർ ഡാസ്ലറുകൾ (Laser Dazzlers): ഭാരത് ഇലക്ട്രോണിക്‌സ് ലിമിറ്റഡ് (BEL) നിർമ്മിച്ച് ഇന്ത്യൻ നാവികസേനയ്ക്ക് നൽകുന്ന ഇവ, സംശയാസ്പദമായ വാഹനങ്ങളെയോ ഡ്രോണുകളെയോ തടയാൻ ഉപയോഗിക്കുന്ന മാരകമല്ലാത്ത ലേസർ ആയുധങ്ങളാണ്. Content Highlights: DRDO is developing DURGA-II and Mk-II(A) laser weapons for air defense., Laser weapons offer 'near-zero cost per shot' compared to expensive missiles., High precision in neutralizing drone swarms and aerial threats., Unlimited ammunition capacity as long as power supply is available., Successfully tested at Kurnool range in April 2025. Published: 14 Mar 2026, 03:05 pm IST Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.