GMTവേണ്ട പകരം MST, മഹാകാൽ സ്റ്റാൻഡേർഡ് ടൈം സ്ഥാപിക്കണമെന്ന് കേന്ദ്ര വിദ്യാഭ്യാസമന്ത്രി

ഭോപാൽ: ലോകത്തിന്റെ സമയം ക്രമീകരിക്കാൻ പുരാതന ഇന്ത്യൻ സമയബിന്ദുവിനെ അടിസ്ഥാനമാക്കിയുള്ള നിർദേശം മുന്നോട്ടുവെച്ച് കേന്ദ്ര വിദ്യാഭ്യാസമന്ത്രി ധർമ്മേന്ദ്ര പ്രധാൻ. ഗ്രീൻവിച്ച് മീൻ ടൈമിന് (GMT) പകരം പുതിയ 'മഹാകാൽ സ്റ്റാൻഡേർഡ് ടൈം' (MST) ഏർപ്പെടുത്തണമെന്നും അദ്ദേഹം ആവശ്യപ്പെട്ടു. To advertise here, ജ്യോതിശാസ്ത്രവുമായും സമയനിർണ്ണയവുമായും ബന്ധമുള്ള പുരാതന നഗരമായ ഉജ്ജൈനിയെ "കൊളോണിയലിസ്റ്റുകൾ" നിശ്ചയിച്ച ഇംഗ്ലണ്ടിലെ ഒരു പട്ടണത്തിലൂടെ കടന്നുപോകുന്ന സാങ്കൽപികരേഖയ്ക്ക് പകരം സമയമളക്കുന്നതിനുള്ള ആഗോള മാനദണ്ഡമായി അംഗീകരിക്കണമെന്നും പ്രധാൻ പറഞ്ഞു. മധ്യപ്രദേശിലെ ഉജ്ജൈനി സന്ദർശിച്ച വേളയിലായിരുന്നു ധർമ്മേന്ദ്ര പ്രധാന്റെ അഭിപ്രായപ്രകടനം. "ഭൂമധ്യരേഖയും ഉഷ്ണമേഖലയും കൂടിച്ചേരുന്നതും പുരാതന ലോകസമയ കണക്കുകൂട്ടലുകൾ നടത്തിയതും ഉജ്ജൈനിയിലാണ്. അതിനാൽ, 'ഗ്രീൻവിച്ച് മീൻ ടൈമിന്' (GMT) പകരം 'മഹാകാൽ സ്റ്റാൻഡേർഡ് ടൈം' (MST) സ്ഥാപിക്കേണ്ട സമയമാണിതെന്ന് പ്രധാൻ പറഞ്ഞു. ഇത് രാജ്യത്തിന്റെ ശാസ്ത്രീയ അഭിമാനം ലോകമെമ്പാടും പുനഃസ്ഥാപിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു. നഗരത്തിലെ പ്ലാനറ്റേറിയം കോംപ്ലക്സിൽ നടന്ന മൂന്ന് ദിവസത്തെ 'മഹാകാൽ: ടൈം മാസ്റ്റർ' അന്താരാഷ്ട്ര സമ്മേളനം ഉദ്ഘാടനം ചെയ്തതിന് ശേഷമാണ് ഈ പരാമർശം നടത്തിയത്. ഉജ്ജൈനി സയൻസ് സെന്റർ അദ്ദേഹം അനാച്ഛാദനം ചെയ്യുകയും ശാസ്ത്ര പ്രദർശനം ഉദ്ഘാടനം ചെയ്യുകയും ചെയ്തു. "ഉജ്ജൈനിയിലെ സയൻസ് സെന്ററും പ്ലാനറ്റേറിയവും ശക്തിപ്പെടുത്തുന്നത് ഈ ദിശയിലുള്ള ഒരു പ്രധാന ചുവടുവെപ്പാണ്, ഭാവി തലമുറയ്ക്ക് ശാസ്ത്രീയമായ കാഴ്ചപ്പാടോടെ മുന്നോട്ട് പോകാൻ ഇത് സഹായിക്കും. ആത്മീയതയും ശാസ്ത്രവും തമ്മിലുള്ള അകലം ഇല്ലാതാവുകയും പുതിയ കാഴ്ചപ്പാടുകൾ ജനിക്കുകയും ചെയ്യുന്ന സ്ഥലമാണ് ഉജ്ജൈനി," അദ്ദേഹം കൂട്ടിച്ചേർത്തു. ധർമ്മേന്ദ്ര പ്രധാനോടൊപ്പം ഉണ്ടായിരുന്ന മധ്യപ്രദേശ് മുഖ്യമന്ത്രി മോഹൻ യാദവ് ഈ ആശയത്തെ പിന്തുണച്ചു. ഉജ്ജൈനി ചരിത്രപരമായി ജ്യോതിശാസ്ത്രത്തിന്റെ ഒരു ആഗോള കേന്ദ്രമായിരുന്നതായി അദ്ദേഹം പറഞ്ഞു."ഉജ്ജൈനിയിൽ, സമയനിർണ്ണയം കേവലം മതപരമല്ല, പൂർണ്ണമായും ശാസ്ത്രീയവുമാണ്. നമ്മുടെ പൂർവ്വികർ സൂര്യ സിദ്ധാന്തം പോലുള്ള ഗ്രന്ഥങ്ങളിലൂടെ വളരെക്കാലം മുമ്പേ ഇത് സ്ഥാപിച്ചിട്ടുണ്ട്. സമയവും സ്ഥലവും പരസ്പരം ബന്ധപ്പെട്ടിരിക്കുന്നു," യാദവ് പറഞ്ഞു. സൂര്യോദയം, സൂര്യാസ്തമയം, ഗ്രഹങ്ങളുടെ ചലനം എന്നിവയെ അടിസ്ഥാനമാക്കിയുള്ളതായിരുന്നു പരമ്പരാഗത ഇന്ത്യൻ സമയ നിർണയ രീതി. ഇത് ഗ്രീൻവിച്ച് മീൻ ടൈമിനെക്കാൾ കൃത്യമായിരുന്നുവെന്നും അദ്ദേഹം അവകാശപ്പെട്ടു. ഉജ്ജൈനിയെ ഒരു മതപരവും ശാസ്ത്രീയവുമായ കേന്ദ്രമായി വികസിപ്പിക്കുകയാണ് തന്റെ സർക്കാർ ലക്ഷ്യമിടുന്നതെന്നും യാദവ് കൂട്ടിച്ചേർത്തു. കോൺഗ്രസ് വക്താവ് റാഷിദ് അൽവി പ്രധാന്റെ നിർദേശത്തെ പരിഹസിച്ചു. ബിജെപിയുടെ വികസന അജണ്ട എത്രമാത്രം പാപ്പരത്തമാണെന്ന് ഇത് കാണിക്കുന്നതായി റാഷിദ് അൽവി പറഞ്ഞു. മറ്റുള്ളവർ നിർമ്മിച്ച റോഡുകളുടെയും നഗരങ്ങളുടെയും പേര് മാറ്റുന്നത് ബിജെപിയുടെ വികസന ആശയമാണ്, അൽവി പരിഹസിച്ചു. "ഇപ്പോൾ സമയ മാനദണ്ഡം മാറ്റാനാണ് അവർ ആഗ്രഹിക്കുന്നത്, കാരണം ഇന്ത്യൻ സംസ്കാരത്തിന് ഇതൊക്കെയാണെന്ന് അവർ കരുതുന്നു. എന്നാൽ അതിൽ മാത്രം നിർത്തുന്നത് എന്തിന്? നിങ്ങളുടെ മൊബൈൽ ഫോണുകൾ വലിച്ചെറിയുക, ടെലിഫോണുകൾ നിരോധിക്കുക, വൈദ്യുതി ഉപയോഗിക്കുന്നതിന് പകരം ദീപം തെളിയിക്കുക," അദ്ദേഹം കൂട്ടിച്ചേർത്തു. Content Highlights: Dharmendra Pradhan proposes Mahakal Standard Time (MST) to replace GMT in 2026., Ujjain is highlighted as the historical global center for ancient astronomical timekeeping., The proposal aims to restore India's scientific pride and heritage on a global scale., Madhya Pradesh CM Mohan Yadav supports the initiative, citing Surya Siddhanta., Political debate intensifies with opposition criticism regarding the practicality of the proposal. Published: 05 Apr 2026, 05:40 pm IST Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.