കാറിന് സൈഡ് നൽകിയില്ല: ഫറോക്കിൽ ബസ് ജീവനക്കാരന് മർദ്ദനം; പ്രതിഷേധമായി മിന്നൽ പണിമുടക്ക്

കോഴിക്കോട്: കാറിന് സൈഡ് നൽകിയില്ലെന്നാരോപിച്ച് ബസ് ജീവനക്കാരനെ നാലം​ഗസംഘം മ‌ർ​ദ്ദിച്ചതിൽ പ്രതിഷേധിച്ച് ഫറോക്കിൽ ബസുകളുടെ മിന്നൽ പണിമുടക്ക്. ഇന്നലെ രാത്രി എട്ട് മണിയോടെയാണ് സംഭവം നടന്നത്. ‘ന്യൂ സ്റ്റാർ’ ബസ് ഡ്രൈവർ അർഷാദിനാണ് നാലം​ഗസംഘത്തി​ന്റെ മർ​ദ്ദനമേറ്റത്. പരിക്കേറ്റ ഇയാളെ കോഴിക്കോട് മെ‍ഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അക്രമികളെ ഉടനടി അറസ്റ്റ് ചെയ്യണമെന്നാവശ്യപ്പെട്ടാണ് തൊഴിലാളികൾ പണിമുടക്കുന്നത്. പ്രതികളെ പിടികൂടാതെ സമരം അവസാനിപ്പിക്കില്ലെന്ന നിലപാടിലാണ് ബസ് ജീവനക്കാർ. പണിമുടക്ക് കാരണം പ്രദേശത്ത് യാത്രസൗകര്യം തടസ്സപ്പെട്ടു.