സൗദിയിൽ സർക്കാർ ഉദ്യോഗസ്ഥരായ അഴിമതി വീരന്മാർ വലയിൽ, 360 പേർക്കെതിരെ അന്വേഷണം; 71 പേർ അറസ്​റ്റിൽ

റിയാദ്: സൗദി അറേബ്യയിലെ വിവിധ സർക്കാർ മന്ത്രാലയങ്ങളിൽ നടന്ന അഴിമതി പ്രവർത്തനങ്ങൾക്കെതിരെ ശക്തമായ നടപടികളുമായി അഴിമതി വിരുദ്ധ അതോറിറ്റിയായ ‘നസഹ’. മാർച്ച് മാസത്തിൽ നടത്തിയ വിപുലമായ പരിശോധനകളുടെ ഭാഗമായി 360 ജീവനക്കാർക്കെതിരെ അന്വേഷണം ആരംഭിച്ചതായും 71 പേരെ അറസ്​റ്റ്​ ചെയ്തതായും അതോറിറ്റി അറിയിച്ചു. പ്രധാനമായും ആഭ്യന്തരം, ആരോഗ്യം, കായികം എന്നീ മന്ത്രാലയങ്ങളിലെ ഉദ്യോഗസ്ഥരാണ് നിലവിൽ നടപടി നേരിടുന്നത്. കൈക്കൂലി വാങ്ങുക, ഔദ്യോഗിക പദവി ദുരുപയോഗം ചെയ്യുക തുടങ്ങിയ ഗുരുതരമായ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. അറസ്​റ്റിലായവരിൽ ചിലരെ ജാമ്യത്തിൽ വിട്ടയച്ചതായും അതോറിറ്റി വ്യക്തമാക്കി. ബുധനാഴ്ച പുറത്തിറക്കിയ പ്രസ്താവന പ്രകാരം, കഴിഞ്ഞ ഒരു മാസത്തിനിടെ രാജ്യത്തുടനീളം 1395 പരിശോധനാ പര്യടനങ്ങളാണ് അതോറിറ്റി നടത്തിയത്. സർക്കാർ സ്ഥാപനങ്ങളിൽ സുതാര്യത ഉറപ്പുവരുത്തുന്നതിനും അഴിമതി തുടച്ചുനീക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമായാണ് ഈ നടപടിയെന്ന് ‘നസഹ’ അറിയിച്ചു.