തിരുവനന്തപുരം: കേരളത്തിന്റെ ഭരണസിംഹാസനത്തിലേക്ക് വി.ഡി. സതീശന് നടന്നുകയറിയത് അപ്രതീക്ഷിതമായൊരു വിസ്മയമല്ല, മറിച്ച് കൃത്യമായ പ്ലാനിംഗും അസാമാന്യമായ നേതൃപാടവും ചേര്ത്തുവെച്ച ഒരു രാഷ്ട്രീയ ഗണിതത്തിന്റെ വിജയമാണത്. കേരളത്തിന്റെ മുഖ്യമന്ത്രി പദവിയിലേക്കുള്ള സതീശന്റെ യാത്രയില് നിര്ണ്ണായകമായത് യുഡിഎഫിലെ ഘടകകക്ഷികള്ക്കിടയില് അദ്ദേഹം നേടിയെടുത്ത അചഞ്ചലമായ വിശ്വാസമാണ്.
ഗ്രൂപ്പ് സമവാക്യങ്ങള്ക്കപ്പുറം മുസ്ലീം ലീഗ് കൈക്കൊണ്ട കര്ക്കശമായ നിലപാടാണ് സതീശന് അനുകൂലമായി കാര്യങ്ങള് നീക്കിയത്. ലീഗിനൊപ്പം കേരള കോണ്ഗ്രസും ആര്എസ്പിയും സതീശന് നയിക്കണമെന്ന നിലപാടില് ഉറച്ചുനിന്നതോടെ കോണ്ഗ്രസ് ഹൈക്കമാന്ഡിന് മുന്നില് മറ്റു വഴികളില്ലാതായി. ഇതിനുപുറമെ, ഐ ഗ്രൂപ്പിലെ നിര്ണ്ണായക ശക്തിയായ ജെന്സി പക്ഷത്തിന്റെ പിന്തുണ കൂടി തനിക്കാണെന്ന് സതീശന് വിഭാഗം വാദിച്ചതോടെ ഹൈക്കമാന്ഡ് പൂര്ണ്ണമായും വെട്ടിലാകുന്ന കാഴ്ചയാണ് രാഷ്ട്രീയ കേരളം കണ്ടത്.
സതീശന്റെ മുഖ്യമന്ത്രി പദവിയിലേക്കുള്ള വഴിയില് ഏറ്റവും നിര്ണ്ണായകമായത് പ്രിയങ്ക ഗാന്ധിയുടെ ഇടപെടലായിരുന്നു. വയനാട് ലോക്സഭാ മണ്ഡലത്തില് മുസ്ലീം ലീഗിന്റെ സജീവ പിന്തുണ കോണ്ഗ്രസിന് എത്രത്തോളം അനിവാര്യമാണെന്ന പ്രായോഗിക രാഷ്ട്രീയം പ്രിയങ്കയെ ഗൗരവമായി ചിന്തിപ്പിച്ചു. ദേശീയതലത്തില് കോണ്ഗ്രസിന്റെ കരുത്ത് വര്ദ്ധിപ്പിക്കാന് ലീഗിനെപ്പോലൊരു വിശ്വസ്ത പങ്കാളിയെ പിണക്കരുതെന്ന പ്രിയങ്കയുടെ നിലപാട് സതീശന് തുണയായി.
ഇതോടെ പാര്ട്ടിയിലെ മുതിര്ന്ന നേതാക്കളുടെ എതിര്പ്പുകളെ മറികടന്ന് ഹൈക്കമാന്ഡ് സതീശന്റെ പേര് അംഗീകരിക്കുകയായിരുന്നു. ഇതിനിടെ സതീശന്റെ രാഷ്ട്രീയ മുന്നേറ്റത്തിന് തടയിടാന് എന്.എസ്.എസ് നടത്തിയ അവസാനവട്ട നീക്കങ്ങളും പാളിയതോടെ സതീശന്റെ പദവിക്ക് ഔദ്യോഗിക സ്ഥിരീകരണമായി. സമുദായ സമവാക്യങ്ങള് കൊണ്ട് രാഷ്ട്രീയത്തെ നിയന്ത്രിക്കാന് നോക്കിയവര്ക്ക് ലഭിച്ച ശക്തമായ തിരിച്ചടി കൂടിയായി സതീശന്റെ ഈ സ്ഥാനാരോഹണം.
അധികാരത്തിന്റെ കടിഞ്ഞാണ് കയ്യിലെത്തുമ്പോള് സതീശന് മുന്നിലുള്ള ഏറ്റവും വലിയ വെല്ലുവിളി പാര്ട്ടിക്കുള്ളിലെയും മുന്നണിക്കുള്ളിലെയും വ്യത്യസ്ത ധ്രുവങ്ങളെ ഒരുമിപ്പിക്കുക എന്നതാണ്. മുഖ്യമന്ത്രി എന്ന നിലയില് ഭരണപരമായ കാര്യങ്ങളില് ശ്രദ്ധ കേന്ദ്രീകരിക്കുമ്പോള് തന്നെ, തിരഞ്ഞെടുപ്പ് വിജയത്തിന് പിന്നില് പ്രവര്ത്തിച്ച ഘടകകക്ഷികളെയും പാര്ട്ടിക്കുള്ളിലെ അതൃപ്തരായ നേതാക്കളെയും കൂടെനിര്ത്തേണ്ട വലിയ ഉത്തരവാദിത്തം അദ്ദേഹത്തിനുണ്ട്.
ഡാറ്റാ രാഷ്ട്രീയത്തിന്റെയും ക്രിയാത്മക ഭരണശൈലിയുടെയും വക്താവായ സതീശന്, ഭരണകൂടത്തിന്റെ സുതാര്യത ഉറപ്പാക്കുമെന്നാണ് പ്രവര്ത്തകരുടെ പ്രതീക്ഷ. കെ. സുധാകരനുമായി ചേര്ന്ന് പാര്ട്ടി സംവിധാനത്തെ കേഡര് ശൈലിയിലേക്ക് മാറ്റാന് ശ്രമിച്ച സതീശന്, ഭരണത്തിലും ആ കര്ക്കശ സ്വഭാവം തുടരുമെന്ന് ഉറപ്പാണ്.
വിവാദങ്ങളെ വസ്തുതകള് കൊണ്ട് നേരിടുന്ന സതീശന് ശൈലി കേരളത്തിന്റെ വികസന കാര്യങ്ങളിലും പ്രതിഫലിക്കുമെന്ന് രാഷ്ട്രീയ നിരീക്ഷകര് വിലയിരുത്തുന്നു. സ്പ്രിങ്ക്ളര് മുതല് ലൈഫ് മിഷന് വരെ നീളുന്ന അഴിമതികള്ക്കെതിരെ പോരാടിയ വ്യക്തി എന്ന നിലയില്, അഴിമതിരഹിതമായ ഒരു സിസ്റ്റം കെട്ടിപ്പടുക്കുകയാകും അദ്ദേഹത്തിന്റെ പ്രഥമ പരിഗണന. പക്വതയാര്ന്ന പെരുമാറ്റവും കുറിക്കു കൊള്ളുന്ന വാക്കുകളുമായി സതീശന് കേരളത്തെ നയിക്കുമ്പോള്, അത് യുഡിഎഫിന് പുതിയൊരു ജീവന് നല്കുമെന്ന കാര്യത്തില് സംശയമില്ല.
നിലപാടുകളുടെ കരുത്തില് ഹൈക്കമാന്ഡിനെ പോലും ബോധ്യപ്പെടുത്തി മുഖ്യമന്ത്രി സ്ഥാനത്തെത്തിയ സതീശന്, വരുംകാല കേരള രാഷ്ട്രീയത്തിലെ ഏറ്റവും സ്വാധീനമുള്ള നേതാവായി സ്വയം അടയാളപ്പെടുത്തിക്കഴിഞ്ഞു. എല്ലാവരെയും ഒരുമിച്ച് കൊണ്ടുപോയി ഒരു 'പുതിയ കേരളം' കെട്ടിപ്പടുക്കുക എന്ന വലിയ ദൗത്യമാണ് ഇനി അദ്ദേഹത്തെ കാത്തിരിക്കുന്നത്.