മുംബൈ: ഐപിഎല്ലിൽ പ്ലേ ഓഫ് സാധ്യതകൾ തുലാസിലായ മുംബൈ ഇന്ത്യൻസിനെ നായകൻ ഹർദിക് പാണ്ഡ്യയുടെ അസാന്നിധ്യം കൂടുതൽ ചർച്ചകൾക്ക് വഴിവെച്ചിരിക്കുന്നത്. തുടർച്ചയായി രണ്ട് മത്സരങ്ങളിൽ ഹർദിക്കില്ലാതെ കളിച്ച മുംബൈയ്ക്ക് അടുത്ത മത്സരത്തിലും നായകൻ കൂടെയുണ്ടാകുമോ എന്ന കാര്യത്തിൽ അവ്യക്തത തുടരുകയാണ്. അടുത്ത മത്സരത്തിനായി ടീം ധർമ്മശാലയിലേക്ക് തിരിച്ചപ്പോൾ ഹർദിക് പാണ്ഡ്യ ഒപ്പമില്ലാത്തത് ആരാധകരിൽ ആശങ്ക ഉയർത്തിയിട്ടുണ്ട്.
നായകന്റെ വിട്ടുനിൽക്കലിനെക്കുറിച്ച് കോച്ച് മഹേല ജയവർധനെയുടെ വിശദീകരണം ഇങ്ങനെ: "ഹാർദിക് കടുത്ത പുറംവേദനയെത്തുടർന്ന് വിശ്രമത്തിലാണ്. ആരോഗ്യനില പൂർണ്ണമായും വീണ്ടെടുക്കാത്ത സാഹചര്യത്തിൽ റിസ്കെടുക്കേണ്ടതില്ലെന്നാണ് മെഡിക്കൽ സംഘത്തിന്റെ തീരുമാനം. പരിശീലനം നടത്താനും കഴിഞ്ഞിട്ടില്ല." എന്നാൽ കോച്ചിന്റെ വിശദീകരണം വന്ന് മണിക്കൂറുകൾക്കകം മുംബൈയിൽ തനിച്ച് ബാറ്റിങ് പരിശീലനം നടത്തുന്ന വീഡിയോ ഹർദിക് തന്നെ സോഷ്യൽ മീഡിയയിൽ പങ്കുവെച്ചു. നെറ്റ്സിൽ സിക്സറുകൾ പായിച്ച് താൻ പൂർണ്ണ സജ്ജനാണെന്ന സന്ദേശമാണ് ഹർദിക് നൽകുന്നത്.
പഞ്ചാബിനെതിരായ മത്സരത്തിന് മുന്നോടിയായി ടീം ധർമ്മശാലയിലേക്ക് പോയെങ്കിലും ഹർദിക് മുംബൈയിൽ തുടരുകയാണ്. മുൻപ് ബെംഗളൂരുവിനെതിരായ മത്സരത്തിലും സമാനമായ രീതിയിൽ വിട്ടുനിന്ന ഹർദിക് മത്സരത്തിന് തൊട്ടുമുൻപ് മാത്രമാണ് ടീമിനൊപ്പം ചേർന്നത്. താരവും മാനേജ്മെന്റും തമ്മിൽ അസ്വാരസ്യങ്ങൾ പുകയുന്നുണ്ടെന്ന റിപ്പോർട്ടുകൾ സ്പോർട്സ് ലോകത്ത് സജീവമാണെങ്കിലും ഇരുപക്ഷവും പ്രതികരിച്ചിട്ടില്ല.
തിരിച്ചടികൾ തുടരുന്ന സാഹചര്യത്തിൽ ഹർദിക്കിനെ നായകസ്ഥാനത്ത് നിന്ന് നീക്കാൻ മുംബൈ മടിക്കരുതെന്ന് മുൻ ഇന്ത്യൻ താരം സഞ്ജയ് മഞ്ജരേക്കർ ആവശ്യപ്പെട്ടു. ജസ്പ്രീത് ബുംറയെ നായകനാക്കണമെന്നാണ് മഞ്ജരേക്കറുടെ പക്ഷം. 11 മത്സരങ്ങളിൽ നിന്ന് കേവലം ആറ് പോയിന്റ് മാത്രമുള്ള മുംബൈയ്ക്ക് പ്ലേ ഓഫ് സ്വപ്നങ്ങൾ ബാക്കിയുണ്ടാവണമെങ്കിൽ ഇനിയുള്ള മത്സരങ്ങളിൽ ജയം അനിവാര്യമാണ്.