പിറന്നാൾ ദിനത്തിലെ കളി ചിരികളുമായി വീടിന്റെ ടെറസില്‍ കൂട്ടുകാര്‍ക്കൊപ്പം നിന്ന കുഞ്ഞ് സിഫ്രാന്‍; പെട്ടെന്ന് ജീവൻ പോകുന്ന നിലവിളി കേട്ടെത്തിയവർ കണ്ടത് നടുക്കുന്ന കാഴ്ച; വെട്ടുകല്ലുകള്‍ തലയിലേക്ക് ഇടിഞ്ഞു വീണ് ആറ് വയസ്സുകാരന്റെ മരണം; വേദന താങ്ങാൻ കഴിയാതെ ഉറ്റവർ

മലപ്പുറം: മലപ്പുറം ജില്ലയിലെ നിലമ്പൂർ രാമംകുത്തിൽ പിഞ്ചുബാലന്റെ ദാരുണാന്ത്യം ഒരു നാടിനെയാകെ കണ്ണീരിലാഴ്ത്തിയിരിക്കുകയാണ്. രാമംകുത്ത് പാറേങ്ങൽ മൊയ്തുവിന്റെ മകൻ സിഫ്രാൻ എന്ന ആറ് വയസുകാരനാണ് വീടിന്റെ തൂൺ ഇടിഞ്ഞുവീണ് മരണപ്പെട്ടത്. ഏറെ വേദനാജനകമായ കാര്യം, വെള്ളിയാഴ്ച സിഫ്രാന്റെ ആറാം ജന്മദിനമായിരുന്നു എന്നതാണ്. പിറന്നാൾ ആഘോഷത്തിന്റെ സന്തോഷം വീട്ടിലും പരിസരത്തും നിറഞ്ഞുനിൽക്കെയാണ് അപ്രതീക്ഷിതമായി ഈ വലിയ ദുരന്തം വിരുന്നെത്തിയത്. കുടുംബാംഗങ്ങളും സുഹൃത്തുക്കളും സിഫ്രാന്റെ ജന്മദിനം ആഘോഷിച്ചതിന് തൊട്ടുപിന്നാലെയാണ് നാടിനെ നടുക്കിയ ഈ വാർത്ത പുറത്തുവന്നത്.

സിഫ്രാന്റെ സ്വന്തം വീടിന് തൊട്ടടുത്തുള്ള ബന്ധുവീട്ടിൽ വെച്ചാണ് അപകടം സംഭവിച്ചത്. വൈകുന്നേരത്തോടെ മറ്റ് കുട്ടികൾക്കൊപ്പം വീടിന്റെ ടെറസിൽ കളിച്ചുകൊണ്ടിരിക്കുകയായിരുന്നു സിഫ്രാൻ. ടെറസിൽ തുണികൾ ഉണക്കാനായി നിർമ്മിച്ച താൽക്കാലിക അരഫില്ലർ തൂണാണ് അപകടകാരണമായത്. കളിക്കിടെ ഈ തൂണിലെ വെട്ടുകല്ലുകൾ ഇളകി സിഫ്രാന്റെ തലയിലേക്ക് നേരിട്ട് പതിക്കുകയായിരുന്നു.

പെട്ടെന്നുണ്ടായ ആഘാതത്തിൽ കുട്ടിക്ക് ഗുരുതരമായി പരിക്കേറ്റു. കുട്ടികളുടെ നിലവിളി കേട്ട് ഓടിയെത്തിയ ബന്ധുക്കളും അയൽവാസികളും ചേർന്ന് ഉടൻ തന്നെ സിഫ്രാനെ അടുത്തുള്ള ആശുപത്രിയിൽ എത്തിച്ചെങ്കിലും അപ്പോഴേക്കും ജീവൻ നഷ്ടമായിരുന്നു. തലയ്ക്കേറ്റ മാരകമായ പരിക്കാണ് മരണകാരണമെന്നാണ് പ്രാഥമിക നിഗമനം.

മൊയ്തുവിന്റെയും ഷൈഹയുടെയും മകനായ സിഫ്രാന് മൂന്ന് സഹോദരങ്ങളാണുള്ളത്; റാഷിൻ, റഷ ഫാത്തിമ, സായാൻ എന്നിവർ. ജന്മദിനത്തിന്റെ മധുരം നുകരേണ്ടിയിരുന്ന ബാലൻ മണിക്കൂറുകൾക്കുള്ളിൽ മരണത്തിന് കീഴടങ്ങിയത് വിശ്വസിക്കാനാവാതെ തളർന്നിരിക്കുകയാണ് മാതാപിതാക്കളും ബന്ധുക്കളും.

ഒരു നിമിഷത്തെ അശ്രദ്ധയോ അല്ലെങ്കിൽ നിർമ്മാണത്തിലെ അപാകതയോ ആകാം ആ കുഞ്ഞുജീവനെ കവർന്നെടുത്തത്. കളിച്ചിരികളുമായി മുറ്റത്തും ടെറസിലും നിറഞ്ഞുനിൽക്കേണ്ടിയിരുന്ന മകൻ ഇനി ഓർമ്മ മാത്രമാണെന്ന സത്യം ഉൾക്കൊള്ളാനാവാതെ കുടുംബം വിങ്ങുകയാണ്. നിലമ്പൂർ പോലീസും നാട്ടുകാരും സ്ഥലത്തെത്തി തുടർനടപടികൾ സ്വീകരിച്ചു. ഒരു പ്രദേശം മുഴുവൻ തേങ്ങലോടെയാണ് ആ കുരുന്നിന് വിട നൽകുന്നത്.