തിരുവനന്തപുരം: സംസ്ഥാനത്ത് പുതിയ യു.ഡി.എഫ് സര്ക്കാര് അധികാരമേറ്റതിനു പിന്നാലെ ഭരണസിരാകേന്ദ്രത്തില് വന് ഐ.എ.എസ് അഴിച്ചുപണി. ഒരേസമയം അന്പതോളം മുതിര്ന്ന ഉദ്യോഗസ്ഥരെ സ്ഥലം മാറ്റിയതോടെ സംസ്ഥാനത്തെ ഭരണസംവിധാനത്തിന് ഇനി കൃത്യമായ 'യു.ഡി.എഫ് മുഖം' കൈവരും. ഇടതുപക്ഷ സര്ക്കാരിന്റെ കാലത്ത് താക്കോല്സ്ഥാനങ്ങളില് ഇരുന്നവരെ പൂര്ണ്ണമായും മാറ്റിയാണ് പുതിയ ഭരണകൂടം തങ്ങളുടെ മുന്ഗണനകള് വ്യക്തമാക്കിയിരിക്കുന്നത്. ലത്തീന് സഭയുടെ കടുത്ത നിര്ദ്ദേശങ്ങള് കൂടി പരിഗണിച്ചാണ് വിഴിഞ്ഞം തുറമുഖത്തിന്റെ തലപ്പത്ത് പുതിയ നിയമനം നടന്നിരിക്കുന്നത് എന്ന സൂചനകള് പുറത്തുവരുമ്പോഴും, തുറമുഖ വകുപ്പില് പൂര്ണ്ണ നിയന്ത്രണം ഏറ്റെടുത്ത് മുഖ്യമന്ത്രി വി.ഡി. സതീശന് തന്റെ രാഷ്ട്രീയ കരുത്ത് തെളിയിക്കുകയാണ്.
തീരദേശ മേഖലയിലെ സമുദായങ്ങളുടെ ആശങ്കകള് പരിഗണിക്കുന്നതിന്റെ ഭാഗമായി, വിഴിഞ്ഞം തുറമുഖം എം.ഡിയായും മാരിടൈം ബോര്ഡ് സി.ഇ.ഒയായും ജെറോമിക് ജോര്ജിനെയാണ് യു.ഡി.എഫ് സര്ക്കാര് നിയമിച്ചിരിക്കുന്നത്. വിഴിഞ്ഞം പദ്ധതിയുടെ സുഗമമായ നടത്തിപ്പിന് ലത്തീന് സഭയുടെ പിന്തുണ അത്യാവശ്യമാണെന്ന രാഷ്ട്രീയ യാഥാര്ത്ഥ്യം മനസ്സിലാക്കിയാണ് ഈ നീക്കം. എന്നാല്, സഭയുടെ നിര്ദ്ദേശങ്ങള് അംഗീകരിക്കുമ്പോള് തന്നെ പദ്ധതിയുടെ പൂര്ണ്ണമായ ഭരണപരമായ നിയന്ത്രണം മുഖ്യമന്ത്രിയുടെ ഓഫീസില് തന്നെ നിലനിര്ത്താന് വി.ഡി. സതീശന് ശ്രദ്ധിച്ചിട്ടുണ്ട്. ഇതിന്റെ ഭാഗമായാണ് തന്റെ വിശ്വസ്തനും മുഖ്യമന്ത്രിയുടെ സെക്രട്ടറിയുമായ രത്തന് യു. കേല്ക്കര്ക്ക് തീരദേശ ഷിപ്പിങ്, ഉള്നാടന് ജലഗതാഗതം എന്നിവയുടെ അധികച്ചുമതല നല്കി മുഖ്യമന്ത്രി വകുപ്പില് പിടിമുറുക്കിയത്. ഇതിനൊപ്പം എല്ലാ മന്ത്രിമാരും ഇനി എട്ടു മണിമുതല് സെക്രട്ടറിയേറ്റിലുണ്ടാകും. വൈകിട്ട് മൂന്ന് മുതല് അഞ്ചു വരെ പൊതുജനങ്ങളേയും കാണും.
ചുരുക്കത്തില്, മുഖ്യമന്ത്രിയുടെ വിശ്വസ്തനായ രത്തന് കേല്ക്കര് അറിയാതെ ഇനി കേരളത്തിലെ ഒരു തുറമുഖത്തും കപ്പലടുക്കില്ലെന്ന വ്യക്തമായ സന്ദേശമാണ് ഈ അഴിച്ചുപണിയിലൂടെ പുറത്തുവരുന്നത്. കേരളത്തെ അന്താരാഷ്ട്ര തലത്തില് ശ്രദ്ധേയമായ തുറമുഖ നഗരമാക്കി മാറ്റാനുള്ള വലിയ ദൗത്യത്തിന് മുഖ്യമന്ത്രി തന്നെയാണ് നേരിട്ട് അണിയറയില് നേതൃത്വം നല്കുന്നത്. അതുകൊണ്ടുതന്നെയാണ് തന്റെ ഏറ്റവും വിശ്വസ്തനായ സെക്രട്ടറിയെ തന്നെ തുറമുഖങ്ങളുടെ മേല്നോട്ടത്തിനായി അദ്ദേഹം നിയോഗിച്ചതും. നയപരമായ തീരുമാനങ്ങളെല്ലാം മുഖ്യമന്ത്രിയുടെ നേരിട്ടുള്ള നിയന്ത്രണത്തിലാക്കാന് ഈ തന്ത്രപരമായ നീക്കത്തിലൂടെ സാധിക്കും.
തുറമുഖ വകുപ്പിന് പുറമെ, കഴിഞ്ഞ ഇടതുപക്ഷ സര്ക്കാരിന്റെ കാലത്ത് കടുത്ത രാഷ്ട്രീയ വിവാദങ്ങള്ക്ക് വഴിവെച്ച പി.ആര്.ഡി (വിവര-പൊതുജനസമ്പര്ക്ക) വകുപ്പിലും കൃത്യമായൊരു 'ശുദ്ധികലശം' പുതിയ സര്ക്കാര് നടത്തിയിട്ടുണ്ട്. പി.ആര്.ഡി സ്പെഷല് സെക്രട്ടറി സ്ഥാനത്തു നിന്ന് ടി.വി. സുഭാഷിനെ മാറ്റി കൃഷി വകുപ്പിലേക്ക് നിയമിച്ചു. പകരം പി.ആര്.ഡി ഡയറക്ടറുടെ അധികച്ചുമതല സബിന് സമീദിനാണ് നല്കിയിരിക്കുന്നത്. മുന് സര്ക്കാരിന്റെ പി.ആര് പബ്ലിസിറ്റി രീതികളെ പൂര്ണ്ണമായും മാറ്റിമറിച്ച്, പുതിയ സര്ക്കാരിന്റെ വികസന നയങ്ങള് ജനങ്ങളിലേക്ക് എത്തിക്കാനാണ് പുതിയ മാറ്റം.
വയോജന ക്ഷേമം ഉള്പ്പെടെയുള്ള സുപ്രധാന മേഖലകളും മുഖ്യമന്ത്രി തന്റെ വിശ്വസ്തനായ രത്തന് കേല്ക്കറുടെ കൈകളില് തന്നെയാണ് ഭദ്രമാക്കിയിരിക്കുന്നത്. സാമൂഹിക സുരക്ഷാ പദ്ധതികളുടെ നടത്തിപ്പില് മുഖ്യമന്ത്രിയുടെ നേരിട്ടുള്ള ശ്രദ്ധ പതിയാന് ഇത് സഹായിക്കും. ഇതിലൂടെ വിവിധ സര്ക്കാര് വകുപ്പുകളില് തന്റെ കൃത്യമായ മേല്നോട്ടവും ആധിപത്യവും ഉറപ്പിക്കാന് വി.ഡി. സതീശന് പൂര്ണ്ണമായി സാധിക്കും. വരും ദിവസങ്ങളില് ഭരണപരമായ വേഗത കൂട്ടാന് ഈ കേന്ദ്രീകൃത നിയന്ത്രണ സംവിധാനം ഉപകരിക്കുമെന്നാണ് വിലയിരുത്തല്.
മുന് സര്ക്കാരിന്റെ കാലത്ത് ദീര്ഘകാലം ഒരേ തസ്തികകളില് തുടരുകയും പാര്ട്ടി താല്പര്യങ്ങള്ക്കനുസരിച്ച് പ്രവര്ത്തിക്കുകയും ചെയ്തു എന്ന് യു.ഡി.എഫ് ആരോപിച്ച ഉദ്യോഗസ്ഥരെയെല്ലാം പ്രാധാന്യമില്ലാത്ത തസ്തികകളിലേക്ക് മാറ്റിയിട്ടുണ്ട്. കെ.എസ്.ഇ.ബി ചെയര്മാനായും എം.ഡിയിലുമായി എം.ജി. രാജമാണിക്കത്തെ നിയമിച്ചതാണ് മറ്റൊരു സുപ്രധാന മാറ്റം. കെ.എസ്.ഇ.ബിയിലെ യൂണിയന് ഭരണത്തിനും സാമ്പത്തിക പ്രതിസന്ധിക്കും തടയിടാന് രാജമാണിക്കത്തിന്റെ കടുത്ത ഭരണശൈലി ഉപകരിക്കുമെന്നാണ് സര്ക്കാര് കണക്കുകൂട്ടുന്നത്. ഊര്ജ്ജം, പരിസ്ഥിതി, ദേവസ്വം വകുപ്പുകളുടെ അധികച്ചുമതലയും അദ്ദേഹത്തിനുണ്ട്.
അതുപോലെ തന്നെ തദ്ദേശഭരണ പ്രിന്സിപ്പല് സെക്രട്ടറിയായി ടിങ്കു ബിസ്വാളിനെയും നിയോഗിച്ചിട്ടുണ്ട്. ഗതാഗത സെക്രട്ടറിയായി ടി.വി. അനുപമ എത്തുമ്പോള്, എയര്പോര്ട്ട്, മെട്രോ റെയില്, പേഴ്സണല്, ഭരണപരിഷ്കാരം എന്നിവയുടെ അധികച്ചുമതലയും അവര്ക്ക് തന്നെയാണ് നല്കിയിരിക്കുന്നത്. കെ.എസ്.ആര്.ടി.സിയിലെയും മെട്രോ റെയിലിലെയും വികസന പദ്ധതികള് യു.ഡി.എഫിന്റെ താല്പര്യങ്ങള്ക്കനുസരിച്ച് വേഗത്തിലാക്കാന് അനുപമയുടെ സാന്നിധ്യം സഹായിക്കും. സിവില് സപ്ലൈസ് കോര്പ്പറേഷന്റെയും ഭക്ഷ്യവകുപ്പിന്റെയും ചുമതല ഡോ. ഷര്മിള മേരി ജോസഫിനാണ് കൈമാറിയത്.
എന്. പ്രശാന്തിനെ കായിക സ്പെഷല് സെക്രട്ടറിയായും യുവജനക്ഷേമം, മൃഗശാല, മ്യൂസിയം എന്നിവയുടെ അധികച്ചുമതലയിലേക്കും മാറ്റിയിട്ടുണ്ട്. റവന്യൂ-ദുരന്തനിവാരണ വകുപ്പ് സ്പെഷല് സെക്രട്ടറിയായി കെ. ജീവന് ബാബുവും, ജലവിഭവ വകുപ്പ് സ്പെഷല് സെക്രട്ടറിയായി എസ്. സുഹാസും ചുമതലയേല്ക്കും. എക്സൈസ് കമ്മിഷണര് പദവിയില് സീറാം സാംബശിവ റാവു തുടരുമെങ്കിലും ഐ.ടി വകുപ്പിന്റെ അധികച്ചുമതല കൂടി അദ്ദേഹത്തിന് നല്കിയിട്ടുണ്ട്. പി.ഡബ്ല്യു.ഡി സ്പെഷല് സെക്രട്ടറിയായി ഡോ. അദീല അബ്ദുല്ലയും തദ്ദേശ വകുപ്പ് സ്പെഷല് സെക്രട്ടറിയായി എസ്. ഷാനവാസും എത്തും.
വനിതാ-ശിശുക്ഷേമ വകുപ്പ് പ്രിന്സിപ്പല് ഡയറക്ടറായും ആയുഷ് മിഷന് ഡയറക്ടറായും ദിവ്യ എസ്. അയ്യരെ നിയമിച്ചപ്പോള്, കോളെജ് വിദ്യാഭ്യാസ ഡയറക്ടറായി അഫ്സാന പര്വീണ് ചുമതലയേല്ക്കും. പൊതുവിദ്യാഭ്യാസ ഡയറക്ടറായി സ്നേഹില് കുമാര് സിങ്ങിനെയും, സഹകരണ സൊസൈറ്റി രജിസ്ട്രാറായി എസ്. പ്രേംകൃഷ്ണനെയും നിശ്ചയിച്ചിട്ടുണ്ട്. ഭക്ഷ്യസുരക്ഷാ കമ്മിഷണറായി ശ്രീധന്യ സുരേഷും ലേബര് കമ്മിഷണറായി സഫ്ന നാസറുദീനും എത്തുന്നതോടെ പ്രധാന വകുപ്പുകളിലെല്ലാം പുതിയ നിര ഉദ്യോഗസ്ഥര് സജ്ജമായിക്കഴിഞ്ഞു.
ഭരണത്തിന്റെ ആദ്യഘട്ടത്തില് തന്നെ ഉദ്യോഗസ്ഥ തലത്തില് തങ്ങളുടെ അപ്രമാദിത്വം ഉറപ്പാക്കാന് പുതിയ യു.ഡി.എഫ് സര്ക്കാരിന് ഈ അഴിച്ചുപണിയിലൂടെ സാധിച്ചിട്ടുണ്ട്. മുഖ്യമന്ത്രിയുടെ വിശ്വസ്തര്ക്ക് കൂടുതല് വകുപ്പുകളുടെ ചുമതല നല്കിയതിലൂടെ ഭരണം പൂര്ണ്ണമായും ക്ലിഫ് ഹൗസിന്റെ നിയന്ത്രണത്തിലാക്കുകയാണ് വി.ഡി. സതീശന്. വരും ദിവസങ്ങളില് പുതിയ യു.ഡി.എഫ് നയങ്ങള്ക്കനുസരിച്ച് ഫയല് നീക്കങ്ങള് വേഗത്തിലാക്കാന് ഈ 'ശുദ്ധികലശം' സഹായിക്കുമെന്നാണ് സെക്രട്ടേറിയറ്റില് നിന്നുള്ള പൊതുവിലയിരുത്തല്.